2024-09-11 19:00
ՀՀ անկախության 33-րդ տարելիցին նվիրված միջոցառում դեսպանատանը
ՀՀ անկախության 33-ամյակի կապակցությամբ ԳԴՀ-ում ՀՀ դեսպանատանը տեղի ունեցավ ընդունելություն, որին մասնակցեցին դաշնային կառավարության տարբեր գերատեսչությունների, Բունդեսթագի, տնտեսական, գիտական, հասարակական և դիվանագիտական շրջանակների ներկայացուցիչներ։
Միջոցառման ընթացքում ողջույնի խոսքով հանդես եկան ՀՀ դեսպան Վիկտոր Ենգիբարյանը և ԳԴՀ պարենի և գյուղատնտեսության նախարար Ջեմ Օզդեմիրը։
Իր ելույթում ՀՀ դեսպանն անդրադարձավ ՀՀ արտաքին քաղաքական առաջնահերթություններին, անվտանգային օրակարգային հարցերին և տնտեսական հնարավորություններին։ Դեսպան Ենգիբարյանն ընդգծեց․ «Տարածաշրջանային խաղաղությունը, միջազգային իրավունքի գերակայությունը, ժողովրդավարությունը, մարդու հիմնարար ազատությունները և մեր ինտեգրումը տարածաշրջանային և միջազգային կառույցներին համարում ենք մեր անկախության հիմքը»։ ՀՀ դեսպանը նաև վերահաստատեց Հայաստանի հանձնառությունը միջազգային իրավունքին։
Դաշնային նախարար Օզդեմիրն իր ելույթում քաջալերեց ԵՄ հետ մերձեցման Հայաստանի ջանքերը և ողջունեց ՀՀ կառավարության «Խաղաղության խաչմերուկ» նախաձեռնությունը,- «Այն, որ դուք ակտիվորեն գնում եք փոխըմբռնման ճանապարհով, դրա մասին է վկայում նաև «Խաղաղության խաչմերուկ» նախագիծը։ Նախագիծը շատ ավելին է, քան լոկ ենթակառուցվածքային և տնտեսական զարգացման ծրագիր։ Այն նպատակ ունի կառուցել կամուրջներ և ամրապնդել կապերը տարածաշրջանում բառացի իմաստով, բայց նաև մարդկանց, ընկերությունների և պետական կառույցների միջև շփումների իմաստով։ Նման նախագծերը տարածաշրջանում խաղաղ ապագայի հույս են տալիս և արժանի են աջակցության»։
Ընդունելության ընթացքում հնչեցին Հայաստանի, Գերմանիայի և Եվրոպայի օրհներգերը՝ Անի Աղաբեկյանի (ջութակ), Դանիել Բոլինգերի (կլառնետ), Շտեֆանո Մակորի (ալտ) և Կիրիլ Տիմոֆեևի (թավջութակ) կատարմամբ։
Ընդունելությանը իր մասնակցությունն է ունեցել նաև Սաքսոնիայում ՀՀ պատվավոր հյուպատոսարանի գրասենյակի ղեկավար Սիրարփի Մովսիսյանը:
